"گورورسن داها اوچماغا قانادیم یوخ"
گورورسن داها اوچماغا قانادیم یوخ
قو قوشلارینین آراسیندا...
گولوم! سئوگی شعرینین شاعیری
گرک کیشی اولا
اولماسا، هر شی آلت اوست اولار
آیریلیق یئتیشنه قدر
باغ داها باغ اولمایاجاق،ائو ده ائو
گوروش ده گوروش
| تبليغات | X |
|
"گورورسن داها اوچماغا قانادیم یوخ"
گورورسن داها اوچماغا قانادیم یوخ قو قوشلارینین آراسیندا... گولوم! سئوگی شعرینین شاعیری گرک کیشی اولا اولماسا، هر شی آلت اوست اولار آیریلیق یئتیشنه قدر باغ داها باغ اولمایاجاق،ائو ده ائو گوروش ده گوروش
اومودسوزلوغوموزو آيري –آيري ياشاماقدانسا بير آرايا گلديك من سنه مرزه لري سن منه آغ ريحانلاري سئچدين پايلاشديق دوشونجه لريميزي هردن ائوين قارانليق بوجاغينا هردن كپنكلي گونشه وورولدوق قورخونج مطلقلردنسه بالا جا نسبيت لره سيغينديق ياشامين دوامين اؤيرنمك اوچون هردن پنجره دن ائشييه باخديق سن مني، من سني داشيياماديق آيري-آيري بير بيريميزي داشيديق بوش شهرين، سيلينميش جغرافيانين وورغونونا گلديك اما گئنه ده اومودسوزلوغوموزو گؤزلجه ياشاديق پنجره نين ائشيگينده كي ياشام جغرافياميزلا اوست اوسته دوشمدي من سنين سن منيم اورگيمده خريطه لر ياراتديق من سنه سن منه سفيرلر گوندرديق يئني بير آنلاشما يا قول آتديق آلقيشلار.... اومودسوزلوغوموزو آيري-آيري ياشاماقدانسا بير آرايا گلديك
پوست مودئرن آلا بولا قاريشيق تصادوف بلكه بير گون كيريخيب اليندن ياپيشديم دولدورورام چانتالاريمي گئديرم بوردان بير ايكي اوچ چانتا نه قدر چوخوموش يالقيزليغيم ( انسان يالقيز اولدوغو زامان بوتون ماسكه لري ييرتيب آتير و بو چوخ گؤزل بير باشاريدير.) «جسارت» بعضي جسارتلر بو قدريميش كيفلنميش كئچميشله قارين دويورماق گئدنلره حسرت شعريني يازماق اؤلولره يازماق چوخ راحات بير ايش من سنه يازيرام سئوگي شعريمي اؤلولره اؤلوم اولورسا اولسون ديري سئودالارا هر زامان ياشام «اللرين» آتيل - باتيل چرشنبه آتيليرام چيلپاق اودلاردان تيترك آلوولاريلا توتور اته ييمدن چكيرم اليندن اليمي هله ياناجاغام «سئوگي» داش دوشدو دوشونجه لريميز شهرين باشينا سونرا شهرين قاداسي دوشدو سئوداميزين جانينا سئومك لعنته گلمك ميش سئوديك آللاهين لعنتينه گلديك
«يئني سوزلوك» تنقيديم وار سؤزلوكلره يئني بير سؤزلوك يازيرام يازماغي پوزماق پوزماغي يازماق گتيره جه يم«كوفلان» بير گون آجيخميش پنجره لرين گونشه يئريكله ين دامارلارينا اودولا بيلسم هويوخما جانيم! گونش ده اولسام گونشلي گونلر حسرتي سينيب دامارلاريما بير گون ويداع ترنينه مينيب تؤكولن گؤز ياشلارينا گوله بيلسم هويوخما جانيم آخي... قارانليق اؤلكه سي اوره ييمين تونئللريده بئجريلير آخي........ اؤزوم ده هويوخورام گونشله گئجه آراسيندا كوفلانا مينميشم
«ديناميتلي دوشونجه لر» جيبلريم دولو ديناميت اؤنجه دن دولو چيچك كئفلنرديم اييسيندن ايندييسه وورولموشام پارتلاييشلارا اؤزومو سئويرم فاشيست اولموشام اللريم يوخ جيبلريم دولو ديناميت اؤره ييمله دؤيونور خيياوانلارا آدديم آدديم اكيرم گؤزلريمي گؤزلريم چاخماق چاخماق اتوم بومباسييلا ريقابتده بيليرم، چاره سيز اوره ييمده پارتلاياجاق بو دؤيونتولر چاخناشان گؤزلريمده بلكه او گون اللريم دولو قيرميزي گول قوناق گلديم بو خيياوانلارا
«بهانه» ياغيشلي بير گونده اورك داريخير ياغيش ياغماياندا اورك داريخير بونلار بهانه دير اورك داريخير« دووار» قوش اولسايديم اوچارديم سنه ساري حئييف! سئوگيليم! بير دووارام چكين مندن! اوچورام سنه ساري.
« قارانليق» تيخانيب بوغازيمدا قاليب ياغيشلارين خاطيره سيندن گئجه لرين اولدوز پيريلتيسيندان تيخانيب......... اللريمدن توتمادان آياقلاريمدان سورويور بوغازيمدا قاليب گئجه سني بير اؤسكوره بيلسه يديم آرتيق بير بارداقدان ايچمييه جه ييك
آرتيق بير بارداقدان ايچمييه جه ييك نه سو، نه ايچگي آرتيق سحر اؤپوشلري اولماياجاق پنجره دن گونشين باتيشين سئير ائتمك ده. سن گونشله ياشاييرسان من آيلا آمما بيزده يالنيز بير سئوگي ياشار منيم اوچون وفالي واينجه بير دوست سنين اوچون شوخ بير قيز، آمما من وحشتي سنين گؤزلرينده گؤردوم مني خسته ائله ين سنسن قيسا گؤروشلر، گئج به گئج منيم شعريمده بير تك سنين سسين اوخويور سنين شعرينده منيم روحوم ديدرگين ائله بير اود يانير كي نه اونوتقانليق نه قورخو اونو يئنه بيلر. كئشكه بيلسه يدين بو آندا سنين قورو، پنبه رنگلي دوداقلارين نه قدر سئوديييمي.
بير خاطيره ايچيمده وار
بير خاطيره ايچيمده وار بير آغ داش كيمي قويو ايچينده اونونلا ساواشماق ايسته ميرم، گوجوم ده يوخ: منيم اوچون سئوينجله كدردير.
گؤزلريمه زيللنسه بيري اونو گؤره جك. بير كدرلي اؤيكو ائشيتسه هئچ بو قدر كدرلنمز.
بيليرم آللاهلار اينساني روحونو آلمادان ، نسنه يه چئويررلر. سن ده داشا دؤنوبسن ايچيمده كدري ابديلشديرمك اوچون.
********* كيريسمسين آغ و بوش گونلري. كولك، قار، كولك خيياوانلار زويوشكنسه نئيله ييم- يئريم يوخ گئتمه يه. "خاطره اي در درونم است"، كيتابي، احمد پوري جنابلارينين آنا آخماتووا شعيرلريندن چئويريلري ائحتيوا ائدير. آشاغيداكي شعيرلر بو كيتابيندان سئچيلميشلر: او اوچ شئيي سئوردي او بو دونيادا اوچ شئيي سئوردي گئجه دوعاسيني، آغ توووزو آمئريكانين سولقون خريطه سيني و اوچ شئيي سئومزدي: اوشاقلارين آغلاماسي چايلا بؤيوتگن مورابباسي قادين ساواشقانليغيني. ........و من اونون حيات يولداشييديم
اللريم شاليمين داليسيندا...........
اللريم شاليمين داليسيندا دويونله نيب ايچ ايچه بو گئجه نييه رنگيم بئله سولموش؟ بير آجي ايچگي سونسوز چيله دن اونا ايچيرديم.
ياددان چيخاردا بيلرم اونو؟ ييخيلا ييخيلا ائشييه چيخدي، كدر توزو اوزونده. دلي كيمي آردينجا قاچديم باساماقلاردان آشاغي ائنيب، كوچه يه گيرديم.
باغيرديم:« بو بير ظارافات. اينان! مندن آيريلما.مني بوراخما!» قورخونج گولومسه مه اوزونو بورودو، سويوق سويوق دئدي: «يئلده دورما، سويوق دَير.»
آردي وار عؤمور بويو گوله بيلرم بو دليلييي سيرتيق خياوانلارين چيپس قوخولو گؤزلرينه رئكلام عيشوه لرينه عؤمور بويو گوله بيلرم بو دليلييي اودلاردا سؤنمه يي ماهنيلاردا چالينماغي چاليندي، چاليندي ائله!!!!!!! چاليندي خياوانلارين بئيني هله ده نئونلار قيققيلي اويناييرلار هله ده گؤز ببكلريم ياللي گئدير گونش دامارلاريندان فيشقيردي هله ده گونشلييي نين تامارزيسيندا بو گون داها گوله بيلرم بو دليلييي سطير سطير واراقلانارام يئل توزاغيندا تاپا بيلمزلر هانكي سطيردن قالديغيمي چالينير خياوانلارين بئيني اؤزوم اؤزومدن فيشقيريرام داديرام باغيرتيلاريمي تكرلرين چئينه توپورونده قالان يازيلاريمي |
بو وئبلاق
 >
|
